رموز

هذا البوست من موقع

http://egayptian.blogspot.com/2007/08/blog-post.html

حاسب و اوعى تقولّي مش هيحصل، جايز كل شئ ممكن
في الدنيا دي حصل و جايز لسه فيه ممكنات ماحصلتش و
إلا كانت الناس تبطل تندهش، يعني ممكن نفضل نحطم
المستحيلات لغاية مايجي يوم يكون المستحيل فيه انك تلاقي
مستحيل لكن طالما لسه المستحيلات كتيرة فده معناه ان الدنيا
لسه فاضل فيها كتير وان احتمال النهاية اللي البعض بيطرحه
عبارة عن يأس من بعض الناس لكن الصحيح ان النهاية هتيجي
في وقت لما تكون الكلمة الشائعة على لسان البشر:"قديمة"
يعني نشوف واحد طاير في الهوا نقول "قديمة" العب غيرها"
نلاقي الغول والعنقاء والخل الوفي و نقول "قديمة"، نشوف الناس
المظلومة بتطالب بحقها، و نشوف المصريين بقى عندهم كرامة نقول
" قديمة عملوها قبل كده!" يمكن وقتها الناس تبص لفوق و تقول:
"كفاية دنيا بقى يا رب اصل احنا مابقيناش نلاقي حاجة مش اتعملت
علشان نعملها!".

ربنا بقى وقتها جايز يرحمهم وينهي الدنيا، و يمكن برضه يخلق
مستحيلات جديدة علشان الناس تحطمها، و كإن الدنيا تحدي بين البشر و
المستحيل او بين البشر و المجهول او بين البشر والاله، و كإنهم عايزين
يقولوا "احنا نقدر نعمل اللي انت تعمله"، صحيح ده وهم لكن العقل
البشري اعتبره حقيقة بشكل غير مباشر.

ساعات كتييييربيتهيألي ان الدنيا عبارة عن لعبة زي لعب الملاهي
اللي بتدور حوالين نفسها بسرعة لدرجة ان بعض الناس بتتنطر منها
وساعات بتيجي على بالي في صورة الطابور الطويل للمهاجرين
الفلسطينيين المذكور في رواية "الطريق الى بئر سبع" ، لكن الطابور
ده لا ليه أول و لا آخر و اللي بيقع فيه ماحدش بيقدر ينقذه الا نفسه لأن
كل واحد مشغول بنفسه .

سيناريو يوم القيامة الاسلامي بيتطبق دلوقتي في الدنيا على نحو مصغر
السيناريو بيقول ان الأب والأم هيتنكروا لأولادهم و كل واحد يقول نفسي
نفسي، ده فعلا اللي بيحصل بس على نحو مصغر وعلى حاجات ماتستاهلش
و أحيانا تستاهل لكن برضه بتفضل مشكلة الرحمة اللي المفروض تتطبق و
انا مش عارف اسمها الرحمة ولا التسامح لكن اعرف انها بتتضمن مراعاة
حقوق الاخرين و مراعاة الواجبات بنفس القدر اللي بنراعي بيه اننا نحصل
على حقوقنا ساعات بيكون اللي بيطالب بحقوقه سيئ في عيون الناس إنه
بيطالب بحقوقه من غير ما يؤدي الواجبات اللي عليه تجاه الناس او الوطن
اوالاله اوتجاه نفسه، و ساعات بتكون فيه ناس بتؤدي واجبها بدون انتظار
انها تاخد حقوقها من حد ده بس علشان هي بتحس بالسعادة وهي بتؤدي
واجباتها، و بعض الناس بتحب تؤدي واجباتها علشان لما تيجي تطالب
بحقوقها تكون متأكدة ان مفيش حد هيعايرها انها بتدور على مصلحتها
اوان عينها فارغة مايملاهاش غير التراب او اي حاجة من الحاجات دي
اللي بيقولوها الناس، المهم ان الانسان لما يوصل للنهاية يكون راضي
عن اللي عمله ،مش شرط يكون مبسوط لأن مش كل حاجة بنعملها في
الدنيا بتبسطنا لإن فيه حاجات كتير في الدنيا مؤلمة لكن احنا بنشعر
بالرضى عنها و عن نفسنا لاننا قدرنا نتخطاها.

اما الانسان يشعر بالرضى عن نفسه و عن اللي قدمه في الدنيا بيكون
حقق هدفه و هدف كل البشر و هو الشعور بالراحة اللي بتيجي بعدها
السعادة ثم النشوة ،علشان كده لازم يكون كل انسان بيؤدي عمله أو بيعيش
في الدنيا و هدفه انه يعمل حاجة يشعر عنها بالرضى لما ييجي يفتكر شريط
حياته في اللحظات الأخيرة ليه في الدنيا،و يا سلام لو ساب الدنيا و على وشه
ابتسامة ،يبقى انسان رائع ، و النموذج الحقيقي للبطل اللي يقدر يعدي كل
الدنيا الصعبة دي و بعدين يبتسم و كإنه بيقول:"حلوة ،عاوز العبها تاني"ا